Top Ten List 1/2 - 口是心非

友人卡臣的「香港十大」句句精彩到肉，睇到我拍晒手掌，心養養想寫一篇。奈何唔夠料，只係諗到五大，各位讀者，有興趣可以幫我寫多五大，集思廣益。（乃試驗性質，如有雷同，實屬巧合）

統計顯示，「口是心非」並不是女人的專利，有時男人講野，都咪話句句當真。

No. 5
「我無事呀」
面對面，口黑面黑，身為女伴一定心知不妙，想為男方分擔一下。戰戰兢兢慰問一下：「你有什麼事嗎？」男方繼續黑面，面無表情地回應：「我無事呀！」

得啦，無野講啦！咁既衰樣，真係無事？打死都唔信啦！唔講咪算攞，以為真係好想為你分憂咩，人家只係唔想俾你影響情緒咋。

No. 4
「你都唔識佢既」
這個答案，多數用來掩飾對方既身份，沒錯，我們是不認識這位神秘人，但肯定不是什麼光明磊落的人物。平日約了大明、阿強、偉仔，都會大大聲聲講：「我約左阿偉仔去298呀／我約左阿大明去唱K...」不過，這個white lie的真相，真係唔知好過知。

No. 3
「你鐘意啦」
呢句說話有兩種語氣，第一種：陰聲細氣，面帶微笑，多出現於戀愛初期，大約可以維持半年至一年不等。
第二種，晦晦氣氣，無尾音，聽落掘雷搥，好似撩交打咁。多數配合皺眉頭動作。

出現呢句話，多數都係以下情況 -
女問：「你話呢件衫好唔好睇呀?」男回應：「你鐘意啦！」
女問：「不如我地去食魚生呀?」男回應：「你鐘意啦！」
女問：「不如我地去睇樓呀?」男回應：「你鐘意啦！」

明明就唔想買，唔想食，唔想去，但係偏偏要話「你鐘意啦！」，表面好似好就得人，但係語氣以經表達左強烈既不滿，叫女士知難而退。如果女士們咁唔識做，當佢講真，換來只會是一副臭臉。奉勸各姊妹切勿以身犯險。

No. 2
「我做緊野呀」
男人以事業為重，尤其在香港這個資本主義社會之中，普遍的人都會為努力工作的男人加分。所以，為左做野，遲收工、出外應酬、出埠工幹，就是最佳隱瞞藉口。明明同同事Happy Hour／明明去深水埗買四仔／明明同另一位美女吃飯，都可以話：「我做緊野呀」。
身為女性，最慘既就係唔可以表現出懷疑的語氣，否則一大埋為左將來而努力、都係想你生活過得好d等正氣澟然的說話，叫人不得不說句：「好啦，咁唔好做得咁辛苦喇...」

No. 1
「我知錯喇」
若要數國際通用的世紀大騙局，必定出現這一句。有時為了讓身邊的人更容易陷入圈套，老土一點，也會加入跪地、眼淚等形體動作。
知還知，但是否真的斬手指不再犯，我可以肯定，達90%的男士會選擇繼續做，不過，下次就無咁容易露出馬腳了。

總之，一句講晒，信不信由你。